Autoritetet italiane kanë liruar Alket Hatinë, shqiptari i cilësuar si “Zoti i drogës”.

Alket Hatiha

Autoritetet italiane kanë liruar Alket Hatinë, shqiptari i cilësuar si “Zoti i drogës”.

Hatija, një eksponent i njohur në fushën e trafikimit të lëndëve narkotike, u arrestua në gusht të këtij viti në Durrës me qëllim ekstradimin e tij drejt Italisë. 50-vjeçari, ishte shpallur në kërkim ndërkombëtar nga Interpol Roma, pasi gjykata e Apelit e kishte dënuar atë me 20 vite burgim.

Gjykata italiane ka bërë me dije se Hatija ka vuajtur dënimin në Shqipëri.

Plagosja e 3 të rinjve grekë në Athinë, zbardhet dëshmia e 33-vjeçarit shqiptar

Mediat greke kanë zbardhur sot dëshminë e 33-vjeçarit shqiptar Emiliano Jakupi, i vetëdorëzuar pas plagosjes së tre të rinjve nga Kreta në Athinë. Ai akuzohet për bashkëpunim në tentativën e vrasjes edhe pse thjesht ka qëlluar me shpullë një nga tre të plagosurit, para se shoku i tij t’i qëllonte me armë. Ndërkohë policia vazhdon kërkimet intensive për kapjen e 37-vjeçarit Nardi Idrizi alias Fatbardh Idrizi.
37-vjeçarin e kam takuar një vit më parë në Athinë, jemi miq të ngushtë prej 7 muajsh. Kontakti i parë ka ndodhur në një kafe të zonës në “Agios Pavlos” në qendër.

Sa herë që më ftonte për ushqim apo pije shkoja me të. Nuk e dija se kishte precedentë të rëndë penalë, as emrin nuk ia dija si duhet. E njihja me tjetër emër dhe ndryshe ma thatë ju. Të shtunën mbrëma më telefonoi në 2 të mëngjesit, isha duke fjetur, por nuk më bëri përshtypje, sepse 37-vjeçari ishte divorcuar 2 muaj më parë dhe ishte i çmendur pasi e kishte lënë e dashura e tij shumë e re.

Ai më tha “nuk jam mirë dhe dua të shkoj diku për një pije”. I thashë “më ler se jam shumë i lodhur, punoj në mëngjes dhe kam problem me mesin, marr ilaçe dhe nuk mund të pi. Nuk mund të dal nga shtëpia tani, nuk kam makinë.” Pastaj më tha “çohu, bëhu gati dhe do të vij në Melissia të të marr.

Vërtet ka ardhur me makinë, më ka marrë në telefon dhe më ka thënë që “arrita dhe po të pres”. U vesha shpejt dhe shkova. Ai nuk ishte vetëm në makinë. Ishte një person tjetër që nuk e njihja. Shkuam në një lokal në “Kolonaki”. Unë piva një pije dhe 37-vjeçari kishte pirë rreth një duzinë. Pastaj i thashë “ikni”, se koha kalonte dhe nuk duroja dot më. Në fakt, e pyeta nëse mund të më çonte në shtëpi apo mund të merrja një taksi dhe të shkoja vetëm.

Përveç kësaj, për shkak të ilaçeve që marr, nuk më bën të pi alkool. Më tha të shkoja të pimë një pije në “Gazi” dhe pastaj direkt nga rruga “Atiki” të më çonte në shtëpi dhe që të mos i prishja hatrin, pranova dhe shkova për një pije tjetër. Në “Gazi” vazhdoi të pinte dhe unë piva gjysmë. Kur dolëm nga lokali në “Gazi”, nga alkooli, ai nuk mundi ta drejtonte makinën. Ai sheh një piceri përballë lokalit dhe më thotë “uluni në makinë që të marr një picë për të ngrënë”.

Personi tjetër që ishte me ne u largua sepse ishte i vogël dhe nuk mundi më, kështu që ai dhe unë qëndruam. U kthye me picën në dorë dhe e hëngri në makinë. Para se të mbaronte ushqimin ai shkoi përpara dhe ndezi makinën. Pak më para se kishte rënë shi dhe për shkak se makina ishte e madhe, ajo u fut në një pellg me ujë dhe lagu grupin e të rinjve që ndodheshin në trotuar. Njëri nga të rinjtë u kthye dhe i tha: “Çfarë po bën ore …”. Ai kishte një shishe në dorë dhe ia hedh. Xhami i makinës ishte ulur dhe 37-vjeçari u zemërua. Ndaloi xhipin dhe u ndalën edhe makinat e tjera që ishin pas nesh. Zbret poshtë dhe e pyet pse: “Kujt i the…ore”.

Unë gjithashtu zbres në përpjekje për ta mbajtur. Pastaj një nga të rinjtë i tha në rregull nuk të thashë ti …. Ai thotë “ok” dhe kthehet për të shkuar te makina. Në atë moment vijnë dy vëllezërit nga Kreta, më afrohen dhe më pështyjnë në fytyrë. Instinktivisht e godas me shuplakë dhe më pas djali tjetër e godet me grusht 37-vjeçarin.

Më pas gjërat kanë dalë jashtë kontrollit dhe 37-vjeçari ka nxjerrë një armë dhe i ka qëlluar. Nuk e dija që mbante armë me vete. Ai kthehet dhe më thotë. “Hyp në makinë të ikim.” Isha i trembur. Nuk i thashë asgjë. Kisha ndjesinë se po t’i tregoja diçka, do më kthehej edhe mua. Sapo hipa në xhip, volla dhe gjithçka që i thashë ishte të shkonim në Polici të dorëzoheshim. Ai nuk po fliste. Ai vetëm tha: “Do të të çoj në shtëpi”. Më la dhe u zhduk. Sapo shkova në shtëpi, fillova të telefonoja avokatin tim. Biseduam dhe më në fund vendosa me të që të vija në Drejtorinë e Policisë dhe të dorëzohesha”, ka deklaruar ai.

Mediat greke iu drejtuan avokatit Stamatias Markou, i cili theksoi se “klienti im është i dërmuar nga plagosja e tre të rinjve dhe është i tronditur, ai akuzohet për bashkëpunim të thjeshtë në veprën e vrasjes së mbetur në tentativë. Ai deklaron se ky zhvillim tragjik i një episodi verbal ka qenë rezultat i një personi tjetër dhe jo i tij. Klienti im as e dinte ekzistencën e armës në makinë dhe as nuk mund ta imagjinonte ekzistencën e saj. Duhet theksuar se në orën 02:15 të mëngjesit është kontrolluar drejtuesi dhe mjeti i tij dhe nuk është gjetur arma. Në atë kohë klienti im nuk e kishte takuar shoferin. Ai vetë do të kërkojë pyetjen e kryqëzuar, në mënyrë që ata vetë të konfirmojnë pretendimet e tij”.

Greqi/ Shqiptari i jep fund jetës, qëllon veten me armë

Një shqiptar i ka dhënë fund jetës me armë pas një debati me ish-gruan e tij me të cilën sapo ishte divorcuar. Ngjarja ndodhi dje në Kalo Nero të Greqisë. 

Sipas asaj që është bërë e ditur 50-vjeçari , me armë në dorë ka shkuar në një arë ku punonin bashkëshortja e tij dhe fëmijët e tyre së bashku me punëtorë të tjerë.

Aty, pas një debati të ashpër me ish-gruan, dyshohet se ka qëlluar një herë në ajër dhe më pas, teksa fëmijët e tij kanë tentuar ta qetësojnë, dyshohet se ka qëlluar veten duke i dhënë fund jetës. Policia po heton rreth ngjarjes në fjalë.

Fluturimet nga aeroporti i Vlorës – Albcontrol hap tenderin për hapësirën ajrore

Teksa Aeroporti Ndërkombëtar i Vlorës pritet të nisë fluturimet në fund të vitit 2024, Albcontrol është në kërkim të një konsulenti që do të duhet të hartojë strukturat e hapësirës ajrore, si dhe procedurat e fluturimit, duke përfshirë dhe vlerësimin e sigurisë së operimit.

Ky dikaster, ka hapur një tender me vlerë prej 166.6 mln lekë, ndërkohë që në dokumentet e tenderit specifikohet se hartimi i strukturave të hapësirës ajrore të kontrolluar do të përpiqet të sigurojë përdorimin më efikas të hapësirës ajrore në përputhje me operimin e sigurt të avionëve dhe rrjedhën e shpejtë të trafikut ajror.

Kjo, në mënyrë që masa e hapësirës ajrore të kontrolluar të jetë minimumi i kërkuar për të ruajtur një standard të lartë të sigurisë ajrore. Po ashtu, në dokumente specifikohet se të gjithë aerodromet e certifikuara nga Agjencia e Sigurisë së Aviacionit të Bashkimit Evropian, EASA dhe aerodromet me Procedura Fluturimi Instrumental duhet të ofrojnë të dhëna numerike dhe informacione të klasifikuara nga Organizata Ndërkombëtare e Aviacionit Civil ( ICAO ) si “kritike”, “thelbësore” ose “rutinë” (niveli i integritetit).

Ndërkaq, në dokumente specifikohet se matja e pengesave do të japë të gjitha të dhënat e nevojshme për të gjeneruar Sipërfaqet e Kufizimit të Pengesave, për të hartuar Procedurat e Fluturimit Instrumental dhe për të prodhuar hartat e kërkuara.

Punimet për aeroportin e Vlorës nisën në fund të vitit 2021, ndërkohë që sipas dokumenteve të tenderit pista parashikohet të ketë një gjatësi prej 3200 m dhe gjerësi 45 m.

SCAN

FSHF nderon stafin dhe lojtarët e Kombëtares me dekoratën “Nderi i Kombit”

Që prej orës, 18:00, në Teatrin Kombëtar të Operas dhe Baletit po zhvillohet mbrëmja gala e organizuar nga Federata Shqiptare e Futbollit, “Më të mirët 2023”, nga ku do të vlerësohen me një sërë çmimesh shumë lojtarë talentë e profesionistë në Shqipëri.

Pas akordimit të një sërë çmimesh, në fund të mbrëmjes, Presidenti Duka nderoi të gjithë stafin dhe lojtarët e Kombëtares, të cilët e patën të mundur të ishin të pranishëm, në këtë mbrëmje gala, me dekoratën e Federatës Shqiptare të Futbollit, “Nderi i Kombit”, për arritjen historike, të kualifikimit në fazën e grupeve, të Kampionatit Evropian të futbollit, Euro 2024.Ndërkaq, kujtojmë se Shqipëria ndodhet në grupin B, të këtij turneu, ku përballë do të ketë kundërshtarë, si Italia, Kroacia e Spanja, ku do të përballet respektivisht në datat 15, 19 e 24 qershor. 

Mijëra fermerë gjermanë zbresin me traktorë në rrugët e Berlinit për të protestuar

Mijëra fermerë gjermanë të zemëruar me qindra traktorë zbritën në Berlin të hënën (18 dhjetor) për të protestuar kundër shkurtimeve të planifikuara të subvencioneve për naftën bujqësore dhe taksave rrugore për automjetet bujqësore.

Qeveria e Gjermanisë përballet me thirrje për të ndihmuar fermerët dhe blerësit e makinave duke rishikuar shkurtimet e detyruara nga një vendim gjykate që i heq qeverisë një buxhet prej 60 miliardë euro

Një lëvizje e koalicionit për t’i dhënë fund subvencioneve për naftën bujqësore tërhoqi kritika nga ligjvënësi i Gjelbër dhe Ministri i Bujqësisë Cem Ozdemir dhe nga ligjvënësit që i përkasin liberalëve miqësorë ndaj biznesit të Ministrit të Financave, Christian Lindner.

Konservatorët e opozitës dhe socialdemokratët e kancelarit Olaf Scholz kritikuan gjithashtu vendimin për t’i dhënë fund, pa paralajmërim paraprak, një program që paguante subvencione për blerësit e automjeteve të reja elektrike, ndërsa kritikët thonë se masa do të godiste prodhuesit gjermanë të makinave që tashmë po luftojnë në konkurrencë me kinezët dhe SHBA.

Kritika nxjerr në pah koston politike të imponuar ndaj një koalicioni tashmë të përçarë nga vendimi i Gjykatës Kushtetuese, i cili dëmtoi buxhetin e vitit 2023 dhe vonoi me javë një marrëveshje për një buxhet për vitin e ardhshëm.

Me liri veprimi të kufizuar financiar, tre partitë e koalicionit, të kufizuara nga pikëpamjet e ndryshme mbi korrektësinë fiskale dhe nevojat e shpenzimeve të qeverisë, iu deshën javë të tëra për të rënë dakord për një zëvendësim të buxhetit.

Fermerët në protestën në Berlin thanë se shumica e fermave ishin të drejtuara nga familja dhe tashmë punonin me marzhe të vogla dhe se kostot shtesë do t’i detyronin ata të mbyllnin bizneset e tyre.

Ozdemir tha më herët se alternativa e vetme për mbajtjen e subvencionit për naftën bujqësore ishte mbyllja e fermave.

Aksidentet rrugore u rritën me 82% në nëntor, shkak kryesor sjellja e drejtuesit të mjetit

Aksidentet rrugore kanë vijuar të rriten edhe për muajin nëntor sipas të dhënave të publikuara nga INSTAT.

Në Nëntor 2023 numërohen 167 aksidente rrugore nga 92 të ndodhura në muajin Nëntor 2022.

Për muajin nëntor 2023, numri i aksidenteve rrugore është rritur me 81,5% krahasuar me nëntorin e vitit të kaluar.

“Aksidentet rrugore, në 88% të rasteve, kanë ndodhur si pasojë e sjelljes së drejtuesit të mjetit. Numri më i lartë i aksidenteve në këtë periudhë është kryer nga grup-mosha 25-34 vjeç, duke zënë 34,7% të numrit të aksidenteve gjithsej”, thuhet në njoftimin e INSTAT.

Sakaq përgjatë muajit Nëntor 2023, numri më i lartë i aksidenteve rrugore ka ndodhur ditën e Mërkurë me 19,8%, ndërsa numri më i ulët i aksidenteve ka ndodhur të ditën e Hënë me 8,9%.

Ndërsa numri më i lartë i aksidenteve rrugore ka ndodhur gjatë harkut kohor 08:00-12:00 duke zënë 22,8% të numrit të aksidenteve rrugore gjithsej.

Rritjen edhe aksidentet për 11 mujorin 

Për periudhën janar-nëntor 2023 numërohen 1,128 aksidente rrugore, ndërkohë numri i të aksidentuarve është 1,531 persona.

Krahasuar me periudhën janar-nëntor 2022 numri i aksidenteve rrugore është rritur 6,4%.

Sipas INSTAT për 11 mujorin e këtij viti 12% e rasteve të aksidenteve rrugore kanë ndodhur si pasojë e sjelljes së këmbësorit.

Por krahasuar me 11 mujorin e vitit të kaluar shkaku i aksidenteve për shkak të këmbësorit është ulur 6,9%. Ndërsa aksidentet për shkak të sjelljes së drejtuesit të mjetit janë rritur 4,8%.

Monitor

Gati për të kryer vrasje, arrestohet 23-vjeçari, dy në kërkim

Parandalohet një ngjarje e rëndë kriminale, falë inteligjencës policore dhe reagimit në kohë të shërbimeve të Policisë. I   arrestuar është shtetasi Mateo Dashi, të shpallur në kërkim: Orgest Mehi dhe Gjon Martinaj

I armatosur me snajper me fishekë në fole, gati për të kryer vrasje, rrezikoi jetën e punonjësve të Policisë në pikën e kontrollit dhe u largua me shpejtësi, vijon kontrolli i zonës për kapjen e 23-vjeçarit.

Vihet në pranga njëri nga bashkëpunëtorët e tij dhe shpallet në kërkim një tjetër, për sigurim të kushteve dhe mjeteve për kryerjen e një vrasjeje.

Sekuestrohen 1 armë zjarri snajper me precizion të lartë me fishekë në fole gati për qitje dhe një çantë me fishekë për këtë armë.

Falë inteligjencës policore dhe si rezultat i hetimeve të thelluara që po kryhen intensivisht në kuadër të operacionit policor të koduar “Sundimi i ligjit”, për të zbardhur ngjarjet kriminale të ndodhura së fundi dhe për të parandaluar ngjarje të tjera të mundshme kriminale, specialistët e Seksionit për Hetimin e Krimeve ndaj Jetës, në bashkëpunim me shërbimet e Komisariatit të Policisë Kurbin, duke vlerësuar edhe informacionet e siguruara nga inteligjenca policore, kanë parandaluar një ngjarje të mundshme kriminale.

Në mesnatë, në vendin e quajtur “Kryqëzimi i Fushë Kuqes”, Kurbin, shërbimet e Komisariatit të Policisë Kurbin dhe Forcat e Sigurisë Kombëtare i kanë bërë shenjë ndalimi një automjeti me të cilin dyshohet se po qarkullonte shtetasi që do të kryente vrasje.

Drejtuesi i automjetit, shtetasi O. H., sapo ka parë shërbimet e Policisë, ka rritur shpejtësinë duke rrezikuar jetën e punonjësve të Policisë dhe në fshatin Gurëz ka braktisur automjetin dhe duke përfituar nga errësira është larguar me shpejtësi.

Gjatë kontrollit në automjet, shërbimet e Policisë gjetën një armë zjarri snajper me precizion të lartë, me një krehër me fishekë në të dhe një çantë me fishekë të tjerë për këtë armë.

Në vijim të veprimeve të thelluara hetimore për këtë rast, u vu në pranga shtetasi M. D., 21 vjeç, banues në fshatin Gurëz, Kurbin, si dhe u shpall në kërkim shtetasi Gj. M., 30 vjeç, banues në Fushë Kuqe, Kurbin, të dyshuar si bashkëpunëtorë të shtetasit O. H., 23 vjeç, banues në fshatin Gurëz, Kurbin (i shpallur në kërkim), për veprat penale “Sigurimi i kushteve dhe mjeteve materiale për të kryer vrasje” dhe “Prodhimi dhe mbajtja pa leje e armëve, armëve shpërthyese dhe municionit luftarak”.

Forcat e Sigurisë Kombëtare, ato të DVP Lezhë dhe të Komisariatit të Policisë Kurbin vijojnë kontrollin e zonës, për kapjen e shtetasve O. H. dhe Gj. M.

Vijon puna hetimore në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për identifikimin e shtetasve të tjerë të përfshirë në këtë veprimtari kriminale dhe për dokumentimin e plotë ligjor të saj.

Materialet procedurale iu kaluan Prokurorisë, për veprime të mëtejshme.

1...374375376...416Faqja 375 nga 416