844 persona janë nën hetim nga kjo prokurori, 328 janë procedime të reja, 412 janë hetuar me masë sigurimi arrest me burg. SPAK thekson se në gjykatë janë dërguar rreth 34% e të hetuarve.
43 procedime për krime zgjedhore dhe 29 për vepra terroriste.
SPAK evidenton se ka përdorur përgjime për 163 procedime penale, ndërsa gjatë vitit 2024 janë përgjuar 3096 telefona. “Krahasuar me 2023, numri i përgjimeve më i ulët”, thuhet në raport.
Janë ekzekutuar 2046 vendime gjykate.
Janë identifikuar 16 grupe kriminale të rrezikshme ndërsa Sky ECC mundësoi identifikimin e 9 grupeve
SPAK thekson gjithashtu se ka patur edhe presione të jashtme ndaj Prokurorisë së Posaçme nga krimi i organizuar, aktorë politikë dhe mediatikë të cilët cenojnë pavarësinë e tij Kushtetuese dhe efektivitetin në hetime.
“Ndërhyrjet e jashtme rrezikojnë gjithashtu, integritetin e prokurorëve dhe të procesit hetimor. Për të garantuar pavarësinë e SPAK-ut si dhe mbështetje për prokurorët në çështje të ndjeshme, nevojitet një reagim më i koordinuar dhe në kohë i të gjitha institucioneve të cilat kanë përgjegjësinë e mbrojtjes së integritetit të SPAK”, thuhet në raportin e Prokurorisë së Posaçme.
Grupet kriminale
Raporti i SPAK për vitin 2024 vëren se grupet kriminale shqiptare kanë rol të madh në tregjet ndërkombëtare, në trafikun e drogës dhe trafik të qenieve njerëzore.
Gjithashtu, Prokuroria e Posaçme vëren se grupet kriminale kanë rol edhe në krimin kompjuterik.
Rreth 65.5 milionë euro rezulton të jetë vlera e aseteve të konfiskuara dhe sekuestruara nga SPAK gjatë vitit 2024. Sipas raportit vjetor të këtij institucioni, vlera e aseteve të konfiskuara kap një shifër prej 36.8 milionë eurosh, ndërsa atyre të sekuestruara rreth 27.7 milionë euro. Kaq është vlera e konfiskimeve dhe sekuestrimeve në kuadër të Ligjit Anti-Mafia, Kodit Penal dhe Aktit Normativ.
Nga totali, rreth 56.2% janë konfiskime dhe 43.8% sekuestrime, pjesa dërrmuese e të cilave janë të proceduara sipas Ligjit Anti-Mafia dhe Kodit Penal.
Vlera e pasurive të konfiskuara dhe sekuestruara nga SPAK kapi shifra rekord në vitin që lamë pas. Të dhënat nga raporti tregojnë që pavarësisht se ka pasur një rënie të numrit të pasurive të konfiskuara në 2024, vlera rezulton më e lartë se në 2023. Konkretisht, vlera e pasurive të konfiskuara është në 938 milionë lekë nga 440 milionë lekë që ishte në vitin 2023, dhe 27 milionë euro nga rreth 18 milionë euro që ishte më parë.
