Ballina Shqiperia ime Lëviznin të armatosur në makinë, dy të arrestuar

Lëviznin të armatosur në makinë, dy të arrestuar

Policia e Vlorës ka arrestuar një të ri, i cili qarkullonte me armë zjarri pistoletë me silenciator, pa leje, me vete në automjet.Në kuadër të operacionit të koduar “Nightfall” është vënë në pranga shtetasi Panajot Kola, 19 vjeç, banues në Orikum, i cili akuzohet për veprën penale “Mbajtja pa leje dhe prodhimi i armëve, armëve shpërthyese dhe i municionit”.

Gjithashtu, blutë e Vlorës kanë arrestuar dhe shtetasin Bernard Korça, 34 vjeç, banues në Orikum, i cili drejtonte automjetin ku ndodhej si pasagjer Panajot Kola. 34-vjeçari akuzohet për veprën penale “Moskallëzim i krimit”.

Në mbrëmje, në aksin rrugor “Orikum-Vlorë”, në Radhimë, është ndaluar për kontroll një automjet tip “Mercedes Benz” me të cilin qarkullonin 2 shtetas. Në momentin e ndërhyrjes së Policisë, pasagjeri ka hedhur nga automjeti një çantë dhe ka tentuar të largohet me vrap, por është kapur menjëherë nga shërbimet e Policisë. Gjatë kontrollit në çantën marsup, u gjet një armë zjarri pistoletë me silenciator, e cila u sekuestrua në cilësinë e provës materiale.” – njoftojnë autoritetet.

Policia thotë se në drejtimin e Prokurorisë, vijojnë hetimet për rastin. Materialet procedurale i janë referuar Prokurorisë, për veprime të mëtejshme.