Tregjet globale kanë rënë ndjeshëm dhe dollari amerikan arriti në nivelin më të ulët në gjashtë muaj pas planit te tarifave të njoftuar nga Donald Trump.
Aksionet kryesore në bursat amerikane ranë ndjeshëm. Apple pësoi një goditje me 9% ndërsa Tesla ra më shumë se 8%.
Tregjet evropiane u tronditën gjithashtu: Indeksi standard i Evropës ra me 2.57%. Indeksi DAX i Gjermanisë ra 3%, Indeksi bazë i Francës 3.31% – rënia më e madhe njëditore që nga korriku 2023.
Indeksi standard i Italisë ra 3.6%, rënia e tij më e madhe njëditore që nga marsi 2023.
Dollari u ul gati 2.2% kundrejt një disa valutave të huaja, përfshirë paundin. Tronditja që tregjet globale pësuan pasi Trump njoftoi planin e tij ishte e ngjashme me goditjen që pësuan nga pandemia e Covid-19.
Por presidenti amerikan tha se plani I tij për tarifat po shkon mirë.
Trump foli shkurtimisht për gazetarët teksa linte Shtëpinë e Bardhë për t’u nisur në Florida dhe tha se tregjet dhe aksionet do të rriten dhe ekonomia amerikane do të lulëzojë.
“Tregjet do të rriten, aksionet do tërriten, vendi do të lulëzojë. Dhe pjesa tjetër e botës dëshiron të shohë nëse ka ndonjë mënyrë për të bërë një marrëveshje. Ata kanë përfituar prej nesh për shumë e shumë vite. Për shumë vite ne kemi qenë në anën e gabuar dhe unë mendoj se ajo që do të ndodhë do të jetë e pabesueshme.”
Sekretari I tregtisë I administratës së Trump, Hoëard Lutnick tha se presidenti nuk do të tërhiqet në asnjë mënyrë nga tarifat, ndërsa shumë vende kanë filluar të marrin masa hakmarrëse.
Lutnick tha se Trump duhet lejuar që të drejtojë ekonominë globale pasi e di mirë çfarë po bën.
Por Organizata Botërore e Tregtisë ka ulur ndjeshëm parashikimet e saj për tregtinë globale për shkak të tarifave.
Në vend që të parashikojë një rritje prej 3% në vëllim, tani pritet një tkurrje prej 1%.
Për vetë konsumatorët amerikanë tarifat do të thonë kosto shtesë. Sipas një analize nga The Budget Lab në Universitetin Yale, tarifat e Trump do t’i kushtojnë një familjeje mesatare amerikane rreth 2,100 dollarë në vit.
Familjet me të ardhura më të ulëta përballen me 980 dollarë shtesë në kosto vjetore.
Analiza vlerëson se tarifat e ndryshme të Trump do të rrisin çmimin e të gjitha produkteve prej lëkure, duke përfshirë këpucët, me 18%, veshjet me 16%, pajisjet elektrike me 10%, dhe peshkun dhe produktet e freskëta me 4%.
Të kombinuara, tarifat e Trump do të rrisin çmimet rreth 2.3%, thuhet në raport.
